S'Onnipotenti t'at fattu, De sa fidi defensori
Millanu bivu ritrattu, De Gesus veru pastori.

In su tempus de Neroni
Nascis de babbu paganu
De patria Cagliaritanu
Gentilli de professioni:
Tui tottu in s'educazioni
Conoscis su Redentori.

Millanu bivu ritrattu, De Gesus veru pastori.

Candu intendis is sermoni
De Santu Giacu e Clementi
Abbandonas prontamenti
Is falsas adorazionis:
E cunprendis is rexonis
De sa lèi prus valori.

Millanu bivu ritrattu, De Gesus veru pastori.

Santu Perdu ti at battiau
E ordinau Sacerdotu
Po essiri tui prudenti e dottu
Ti hat de Obispu cunsacrau:
Sendu de Casteddu Prelau
Demostras zelu e fervori.

Millanu bivu ritrattu, De Gesus veru pastori.

Felis impiu Presidenti
Impressionat a Millanu
Cum Pilimu e Lucianu
E Felica giuntamenti:
E maltrattat aspramenti
Custu celesti primori.

Millanu bivu ritrattu, De Gesus veru pastori.

Cun freccias e prus turmentu
Si pensat Felis tirannu
Chi abbandonessit Millanu
Is cattolicus intentus:
Cun prus santus pensamentus
Disprezias tanti rigori.

Millanu bivu ritrattu, De Gesus veru pastori.

Ti fulminat a s'istanti
Una sentenzia de morti
Po ti biri tanti forti
In sa lèi firmu, e costanti:
Cun su pettus de diamanti
Predichendu cun pospori.

Millanu bivu ritrattu, De Gesus veru pastori.

Anima, sanguni e vida
Sacrificas tui gustosu,
Po su populu amprosu,
Chi prangit sa dispidida:
Cun sa morti sclaressida
Logras triumfus de onori.

Millanu bivu ritrattu, De Gesus veru pastori.

In sa planura de Sestu
Su sanguini as derramau
Cruelmenti t'ant apperdiau
Po no morriri tanti prestu:
Custu barbaru pretestu,
Abbivat prus su dolori.

Millanu bivu ritrattu, De Gesus veru pastori.

Tui un annu solamenti
In sa Cresia has governau,
De Sardus segundu prelau
De sa cattolica genti:
E moris costantementi
In su martiriu, e furori.

Millanu bivu ritrattu, De Gesus veru pastori.

Ses medicu prodigiosu,
Chi curas dogna dolenzia,
Calenturas e chinenzia,
Cun tottus ses amorosu:
E ses de dogna chesciosu
Veru babbu, e protettori.

Millanu bivu ritrattu, De Gesus veru pastori.

Sa Sardigna tottu cantu
Ti tenit in devozioni,
Cun lexittima rexoni
Is Sardus ti nanta Santu:
Nascis po divinu spantu,
Moris po divinu amori.

Millanu bivu ritrattu, De Gesus veru pastori.

S'Onnipotenti t'at fattu,
De sa fidi defensori, Millanu bivu ritrattu
De Gesus veru pastori.