Protettori poderosu, De Sardigna speziali
Liberainosi de mali, Efis Martiri gloriosu.

In Elia Nascitis
Acanta de Antiochia,
E donau a idolatria
Finzas a trint'annus bivistis
A su tempus, chi movistis
Contra Sardigna orgogliosu.

Liberainosi de mali; Efis Martiri gloriosu
 
Armadu de crudeli zelu
Arribais a Benaventi
Aundi, accampada sa genti
Os fueddat Deus de su Xelu
Ponendusì in prus de svelu
Unu raiu e tronu spantosu.

Liberainosi de mali; Efis Martiri gloriosu

A su Imperiu Soberanu,
A su tronu, raiu e luxi
Bieis in s'aria una gruxi,
E un'atera in sa manu,
Aturdiu a bonu mengianu
Partistis meda paurosu.

Liberainosi de mali; Efis Martiri gloriosu

In Gaietta differenti
Tottu giài de su chi fustis
Osi feis unu pagu appustis
Cristianu segretamenti,
Cun tottu s'armada genti
Sigheisi allirgu e gustosu.

Liberainosi de mali; Efis Martiri gloriosu
 
A s'intrada in Arborea
Incontrastis resistenzia,
A bosu cun passienzia
Luegu mudastis s'idea,
Passendi a fai pelea
A sa Ogliastra carignosu.

Liberainosi de mali; Efis Martiri gloriosu

Capitanu giài valenti
De Deus cun talis azionis
Suggetastis is Nazionis
De sa prus barbara genti;
E de inni gloriosamenti
A Casteddu vittoriosu.

Liberainosi de mali; Efis Martiri gloriosu

Isciendu s' Imperadori
Custa santa mutazioni
Iscritta os ponni in presoni
Cun ira, rabbia e furori,
Ma s'Angelu de su Signori
Os visitat quidadosu.

Liberainosi de mali; Efis Martiri gloriosu

Giuliu iniquu Presidenti
Cumandat chi a bastonadas
Is palas bostas sagradas
Os seghint incontinenti,
E mudu in mesu a sa genti
Sias oggettu bregungiosu.

Liberainosi de mali; Efis Martiri gloriosu
 
Non cuntenta custas penas
Cussu iniquu Presidenti
Cun puntas de ferru callenti
Os raschiat nerbiu e venas,
Cun respiru essendu appenas
Su corpu bostu di losu.

Liberainosi de mali; Efis Martiri gloriosu

Luegu os torrat cun premura
A presoni un'atera orta
Aundi s'Angelu os cunfortat
E de totu giài osi curat
Parendu cussa grutta oscura
Unu Xelu luminosu.

Liberainosi de mali; Efis Martiri gloriosu

Giuliu Prefettu atturdiu
De osi biri aicci sanu,
Po chi tenestis prus sa manu
De s'idolu destruiu,
De Sardigna ses fuiu
A su istanti timorosu.

Liberainosi de mali; Efis Martiri gloriosu
 
Su successori Flavianu
Pustis de setti turmentus
Inumanus e sangrientus
Os cundennant po Cristianu,
E bosu allirgu euffanu
Abbrazais sa morti gustosu.

Liberainosi de mali; Efis Martiri gloriosu

Custu barbaru infiamau
A vista de tanti passienzia,
Os fulminat sa sentenzia
D'essi in Nora degugliau,
E de su Xelu animau
Offreis su zugu preziosu.

Liberainosi de mali; Efis Martiri gloriosu

De Casteddu appassionau
Sempri siais difensori,
Sighi a essiri intercessori
Efis Martiri sagrau.